Home  |  Morning  |  Resources  |  Publications  |  Scripture  |  Menaion  |  Evening

МИНІА, МѢСЯЦЪ ФЕѴРУАРІЙ.
(Кíевъ: Тѵпогра́фія Кíево-Пече́рской Ла́вры, 1893).

Въ 12-й де́нь.
Слу́жба и́же во святы́хъ отца́ на́шего Алексíя митрополи́та, всея́ Россíи чудотво́рца.

Аще хо́щетъ настоя́тель, соверша́емъ бдѣ́ніе.

НА МАЛѢЙ ВЕЧЕРНИ.


На Го́споди воззва́хъ... стихи́ры пое́мъ на 4, гла́съ 8. Подо́бенъ: О, пресла́внаго чудесе́!

Блаже́нне святи́телю Алексíе,/ ты́, Сло́ва гла́съ воспріе́мъ,/ о тѣле́сныхъ небре́глъ еси́,/ уго́дія и сво́йства оста́вивъ житія́/ и мы́сленное преше́дъ мо́ре,/ и благоче́стія уче́ніемъ,/ и гремѣ́ніи премíрными/ Христу́ послужи́лъ еси́,/ богоблаже́нне. Два́жды.

О чудотво́рче, Алексíе прему́дре,/ ты́ мона́шескимъ житіе́мъ Бо́гу угоди́лъ еси́;/ тя́ бо Бо́гъ пре́жде избра́ отъ ю́ности, о́тче,/ па́стыря овца́мъ слове́снымъ и учи́теля вели́ка,/ ты́ свяще́нникомъ наказа́тель яви́лся еси́/ и все́й странѣ́ Россíйстѣй звѣзда́ пресвѣ́тлая,/ осіява́ющи чудесы́ всѣ́хъ,/ вѣ́рою припа́дающихъ къ ра́цѣ моще́й твои́хъ./ Тѣ́мже мо́лимся:/ проси́ ста́ду твоему́ грѣхо́въ оставле́нія, о́тче богоблаже́нне.

Преподо́бне о́тче, святи́телю Алексíе,/ ты́ со́ннымъ явле́ніемъ разсла́бленнаго здра́ва сотвори́лъ еси́,/ ру́цѣ и но́зѣ укрѣпи́въ,/ оби́дящему глаго́ля:/ а́ще вско́рѣ не отда́си сокро́вища и́скренняго,/ не и́маши со одра́ воста́ти./ Онъ же вско́рѣ, съ покая́ніемъ и со слеза́ми/ къ честнѣ́й твое́й ра́цѣ прише́дъ, исцѣле́ніе получи́,/ о́тче богоблаже́нне.

Сла́ва, гла́съ то́йже, самогла́сенъ:

Пріиди́те, Россíйстіи собо́ри, въ честну́ю па́мять чудотво́рца Алексíя во хра́мъ Боже́ственный, въ не́мже лежи́тъ честна́я его́ ра́ка, я́же и́мать въ себѣ́ исцѣле́ній благода́ть, честно́е тѣ́ло его́. Къ нему́же возопіи́мъ: вели́кій святи́телю Алексíе чудотво́рче, ты́ похвала́ земли́ Россíйстѣй, ты́ и защище́ніе, ты́ сокро́вище неиждива́емое дарова́ній духо́вныхъ и исто́чникъ исцѣле́ній неизчерпа́емый. Тѣ́мъ, воспѣва́юще, глаго́лемъ: ра́дуйся, сто́лпе и утвержде́ніе Це́ркве; ра́дуйся, съ первосвяти́тели предстоя́й престо́лу Христо́ву; ра́дуйся, свѣти́льниче всесвѣ́тлый, вѣ́рныя осіява́яй чудесы́. Но у́бо, честны́й на́шъ святи́телю, моли́ся Христу́ Бо́гу всѣ́хъ спасти́ся душа́мъ на́шимъ.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Святи́телю богоно́се,/ ты́ яви́лся еси́/ отъ млады́хъ ногте́й/ сосу́дъ освяще́нъ, Алексíе,/ и жили́ще Пресвята́го Ду́ха.

Сти́хъ: Свяще́нницы Твои́ облеку́тся въ пра́вду,/ и преподо́бніи Твои́ возра́дуются.

Святи́телей похвало́,/ свяще́нниковъ сла́во,/ мона́шествующихъ пра́вило,/ блаже́нне Алексíе,/ раду́йся, Це́ркве утвержде́ніе.

Сти́хъ: Блаже́нъ му́жъ, боя́йся Го́спода,/ въ за́повѣдехъ Его́ восхо́щетъ зѣло́.

Услы́ши моле́ніе твои́хъ ча́дъ,/ о́тче святи́телю Алексíе,/ и сле́зъ не пре́зри,/ и серде́чная проше́нія/ подава́й лю́бящимъ тя́.

Сла́ва, и ны́нѣ, богоро́диченъ:

Обра́дованная, ра́дуйся,/ я́же ра́дость мíру ро́ждшая,/ Христа́ Жизнода́вца,/ и прама́тернюю, Дѣ́во,/ печа́ль отъе́мшая.

Тропа́рь, гла́съ 8:

Яко апо́столомъ сопресто́льна, и врача́ предо́бра, и служи́теля благопрія́тна, къ ра́цѣ твое́й честнѣ́й притека́юще, святи́телю Алексíе, богому́дре чудотво́рче, соше́дшеся, любо́вію въ па́мять твою́ свѣ́тло пра́зднуемъ, въ пѣ́снехъ и пѣ́ніихъ ра́дующеся и Христа́ сла́вяще, такову́ю благода́ть тебѣ́ дарова́вшаго исцѣле́ній и гра́ду твоему́ вели́кое утвержде́ніе.

Инъ тропа́рь, гла́съ 4:

Апо́стольскихъ догма́тъ опа́сна храни́теля, Це́ркве Россíйскія па́стыря и учи́теля, преблаже́ннаго Алексíя святи́теля па́мять пра́зднующе, славосло́вимъ Христа́ Бо́га на́шего пѣ́сньми достодо́лжными, дарова́вшаго на́мъ уго́дника Своего́, я́ко оби́льный исто́чникъ, точа́щъ врачева́нія, гра́ду же Москвѣ́ похвалу́ и утвержде́ніе.

Сла́ва, и ны́нѣ, богоро́диченъ, гласъ 8:

Иже на́съ ра́ди рожде́йся отъ Дѣ́вы и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й, я́ко Бо́гъ. Не пре́зри, я́же созда́лъ еси́ руко́ю Твое́ю; яви́ человѣколю́біе Твое́, Ми́лостиве; пріими́ ро́ждшую Тя́ Богоро́дицу моля́щуюся за ны́ и спаси́, Спа́се на́шъ, лю́ди отча́янныя.

НА ВЕЛИЦѢЙ ВЕЧЕРНИ.


Блаже́нъ му́жъ.., 1-й антифо́нъ. На Го́споди воззва́хъ.., стихи́ры на 8. Гла́съ 5. Подо́бенъ: Ра́дуйся.

Ра́дуйся, пречестны́й архіере́ю вели́кій, Алексíе преблаже́нне, церко́вный краси́телю, святи́телей честно́е удобре́ніе, Импера́тору Правосла́вному моли́твою помога́я, земли́ Россíйскія вели́кое утвержде́ніе, честны́й учи́телю на́шъ, безпомо́щнымъ по́моще, печа́льнымъ утѣше́ніе ра́достное, моле́бниче те́плый всѣ́мъ скорбя́щимъ, тму́ неразу́мія отгоня́я, и ко Христу́ въ приста́нища ти́хая прите́клъ еси́, въ ли́цѣ безпло́тныхъ предстоя́, и кра́сныя добро́ты Влады́чни наслажда́ешися, и сердца́ благочести́выхъ на пѣ́ніе воздви́глъ еси́. Христу́ помоли́ся дарова́ти душа́мъ на́шимъ ми́ръ и ве́лію ми́лость.

Ра́дуйся, свѣти́ло всея́ Россíйскія митропо́ліи: ты́ бо добродѣ́телію свѣ́тло процвѣ́лъ еси́, я́ко ма́слина плодови́та въ дому́ Бо́жіи, и, разли́чныя плоды́ износя́, бога́тно раздава́еши ста́ду твоему́ слове́сному и на па́житехъ духо́вныхъ ту́чами твои́хъ моли́твъ напоя́еши, исцѣле́нія незави́стно источа́еши вѣ́рою притека́ющимъ къ ра́цѣ моще́й твои́хъ, святи́телю Алексíе. Свѣщу́ свѣ́тлу себе́ угото́валъ еси́, и во оби́телехъ небе́сныхъ всели́вся, и трудо́въ твои́хъ воздая́нія вѣнцы́ прія́лъ еси́, не да́лъ бо еси́ сна́ очи́ма твои́ма и вѣ́ждома дрема́нія, до́ндеже сно́мъ о́бщимъ усну́лъ еси́, преподо́бне святи́телю. Христу́ помоли́ся дарова́ти душа́мъ на́шимъ ми́ръ и ве́лію ми́лость.

Ра́дуйся и весели́ся, Алексíе пресвяще́нный, благода́тный проповѣ́дниче, тве́рдый у́ме, виногра́да живо́тнаго святопрозя́бшій гро́здъ, вино́ иска́пающій, вѣ́рныхъ сердца́ веселя́щее уче́ніи медото́чными, святопома́занная главо́, честны́й на́шъ учи́телю, пріиди́, посѣти́ на́съ, озло́бленныхъ грѣхо́вными страстьми́, пога́ныхъ де́рзость низложи́, проти́вныхъ прожени́, усо́бныя бра́ни укроти́ и болѣ́зни, и неду́ги вся́кія облегчи́, Христу́ моля́ся дарова́ти душа́мъ на́шимъ ми́ръ и ве́лію ми́лость.

Ра́дуйся, пресла́вный гра́де Москва́, красу́йся и весели́ся, сицева́го имѣ́я благода́ти исто́чника неисчерпа́емаго, преблаже́ннаго и чудоноси́ваго Алексíя, святи́теля вели́каго, и́же му́дростію Свята́го Ду́ха укра́шшася и отъ ю́ности добродѣ́тельнаго ра́ди его́ житія́ сосу́дъ Свято́му Ду́ху бы́въ поще́ніи и моли́твами; свяще́нства ма́стію пома́зася, исцѣле́нія да́ръ пріе́мша отъ всѣ́хъ Царя́ Христа́ Бо́га, и по святѣ́мъ его́ преставле́ніи о́трока, е́ле жи́ва су́ща, ма́терію принесе́на къ честнѣ́й его́ ра́цѣ, здра́ва сотвори́. И до ны́нѣ источа́етъ исцѣле́ніе неоскудно съ вѣ́рою приходя́щимъ, и Христу́ мо́лится дарова́ти душа́мъ на́шимъ ми́ръ и ве́лію ми́лость.

Ины стихи́ры, гла́съ 2. Подо́бенъ: Кíими похва́льными.

Кíими пѣ́сненными добро́тами воспое́мъ святи́теля, Христо́ва уста́ ти́хая и Ева́нгелія Его́ проповѣ́дника свѣ́тла, церко́внаго храни́теля и засту́пника земли́ Россíйстѣй, Вѣ́рному Импера́тору на́шему побо́рника. Его́же моли́твами шата́нія враго́въ Христо́съ низложи́, имѣ́яй ве́лію ми́лость. Два́жды.

Кíими бо́дренными устна́ми похва́лимъ святи́теля, Христо́вы Це́ркве краси́теля, Петру́ верхо́вному ревни́теля и Па́влу наслѣ́дника, нра́вы подо́бящася Крести́телю, Петра́ чудотво́рца Россíйскаго сопресто́льника и лучи́ чуде́съ испуща́юща оби́льно, исцѣле́нія подава́юща незави́стно всѣ́мъ, приходя́щимъ съ вѣ́рою и па́мять его́ свѣ́тло пра́зднующимъ, вели́каго засту́пника земли́ Россíйстѣй и учи́теля, Алексíя, ди́внаго чудотво́рца, и Благовѣ́рному Импера́тору на́шему те́плаго посо́бника. Его́же ра́ди враги́ Христо́съ низложи́, имѣ́яй ве́лію ми́лость.

Кíими украше́нными глаго́лы воспое́мъ святи́теля, ди́внаго въ чудесѣ́хъ Алексíя, безпло́тнымъ сожи́теля, освяще́ннаго отъ пеле́нъ, столпа́ Це́ркве неподви́жима, весе́ліе земли́ Россíйстѣй, пра́вды пра́вило, оби́димымъ засту́пника, немощны́мъ врача́ безме́здна. Его́же ра́ди дарова́ Христо́съ Це́рквамъ соедине́ніе, имѣ́яй ве́лію ми́лость.

Сла́ва, гла́съ 6:

Святи́телей удобре́ніе и отце́въ красоту́, исто́чника чуде́съ, земли́ Россíйстѣй засту́пника вели́ка, соше́дшеся, о празднолю́бцы, пѣ́сненными похвала́ми воспое́мъ, глаго́люще: ра́дуйся, Алексíе, тве́рдый у́ме, благода́тію и́стинною окропле́нъ. Отню́дуже и прія́телище бывъ Пресвята́го Ду́ха, чуде́съ даръ воспрія́лъ еси́. И ны́нѣ, съ первосвяти́тели предстоя́ престо́лу Христо́ву, моли́ся о рабѣ́хъ твои́хъ.

И ны́нѣ, богоро́диченъ:

Кто́ Тебе́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Та́же вхо́дъ. Проки́менъ дне́. Чте́нія три́.

При́тчей чте́ніе. Главы́ 10, 3 и 8.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Яко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе. Главы́ 10 и 11.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе. Глава́ 4.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и свята́го самогла́сны, гла́съ 8:

Преподо́бне о́тче, святи́телю Алексíе, а́ще ка́я страна́ или́ кíй гра́дъ молчи́тъ, но вси́, и́же тобо́ю просвѣще́нніи, чуде́съ твои́хъ мно́жество слы́шаще и ви́дяще, и мы́ съ ни́ми похва́льными пѣ́сньми вопіе́мъ и глаго́лемъ: благода́тію Пресвята́го Ду́ха Христо́вымъ апо́столомъ подо́бникъ бы́лъ еси́ и вселе́нную всю́ просвѣща́еши, тѣ́мже и до царя́ доидо́ша словеса́ чуде́съ твои́хъ, я́ко луча́, и да́льнимъ я́ко бли́зъ сія́юща. И на́съ отъ бѣ́дъ и находя́щихъ лю́тъ свободи́ твои́ми моли́твами.

Кто́ дово́ленъ е́сть до́блестей твои́хъ исчести́, преподо́бне о́тче, труды́? Кто́ бо, слы́ша безмѣ́рное твое́ смире́ніе, и терпѣ́ніе, и чадолю́біе, не удиви́тся? Ка́ко у́бо не усумнѣ́вся ни ма́ло, егда́ слы́ша проше́ніе царя́ беззако́нна, — да ми́ по́слеши, — рече́, — о́наго, больны́мъ здра́віе подава́ющаго, и слѣпы́мъ прозрѣ́ніе, и хромы́мъ тече́ніе, и бѣсово́мъ прогони́теля; да ми́ сего́ по́слеши, да умо́литъ своего́ Бо́га и исцѣли́тъ мою́ цари́цу, отжене́тъ бѣ́са и о́чи просвѣти́тъ. Оле проше́нія, превосходя́ща человѣ́ческія ра́зумы! О, ди́вство, бра́тіе! Кто́ не удиви́тся, или́ кто́ не похва́литъ крѣ́пкаго сего́ хра́бреника? Не то́кмо бо не усумнѣ́ся, но и, су́щихъ съ ни́мъ подкрѣпля́я, глаго́лаше: пожди́те, не скорби́те, но упова́ніе возложи́те на Бо́га и на Пречи́стую Его́ Ма́терь и у́зрите сла́ву Бо́жію.

Блага́го Учи́теля Христа́ благíй учени́къ, святи́телю Христо́въ Алексíе, до́брому Па́стырю Христу́ поревнова́лъ еси́, ду́шу твою́ полага́я за о́вцы, и царе́во сверѣ́пство, я́ко льво́во зія́ніе, во о́вчую кро́тость премѣни́лъ еси́, и цари́цу исцѣли́лъ еси́, и ста́ду твоему́ ско́рбь на ра́дость преложи́лъ еси́, и Це́ркви ми́ръ устро́илъ еси́, вели́каго же кня́зя возвесели́лъ еси́. Тѣ́мъ мо́лимся тебѣ́: моли́ о на́съ Человѣколю́бца Влады́ку Христа́, да спасе́тъ ду́ши на́ша.

Сла́ва, гла́съ 6:

Егда́ прише́лъ еси́ отъ царя́, ми́ръ церко́вный, о́тче, нося́, тогда́ святи́теліе и церко́вніи собо́ри, и наро́ди ра́достно срѣта́ху тя́, свободи́теля благода́рно нарица́ху. Овіи же, я́ко побѣди́телю да́ры нося́ще, ра́достію покланя́хуся. Кня́зь же вели́кій Дими́трій со слеза́ми вопія́ше ти́: о вла́дыко! что́ ти́ возда́мы проти́ву труду́ твоему́, и́мже на́мъ ми́ръ дарова́лъ еси́? Но у́бо, святи́телю Алексíе, моли́ся прилѣ́жно Христу́ Бо́гу на́шему, я́ко спасти́ся гра́ду твоему́ невоева́ну.

И ны́нѣ, богоро́диченъ:

По́сланъ бы́сть съ небесе́ Гавріи́лъ арха́нгелъ благовѣсти́ти Дѣ́вѣ зача́тіе и, прише́дъ въ Назаре́тъ, помышля́ше въ себѣ́, чудеси́ удивля́яся: о, ка́ко въ вы́шнихъ Непостижи́мь Сы́й отъ Дѣ́вы ражда́ется? Имѣ́яй престо́лъ не́бо и подно́жіе зе́млю во утро́бу вмѣща́ется Дѣви́чу? На Него́же шестокрила́тіи и многоочи́тіи зрѣ́ти не мо́гутъ, сло́вомъ еди́нѣмъ отъ Се́я воплоти́тися благоизво́ли. Бо́жіе е́сть Сло́во настоя́щее, что́ у́бо стою́ и не глаго́лю Дѣ́вѣ: ра́дуйся, Благода́тная, Госпо́дь съ Тобо́ю; ра́дуйся, Чи́стая Дѣ́во; ра́дуйся, Невѣ́сто Неневѣ́стная; ра́дуйся, Ма́ти Живота́, благослове́нъ Пло́дъ чре́ва Твоего́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Свята́го Ду́ха/ и вселе́ніе благода́ти/ Алексíе, яви́ся./ И ны́нѣ, въ па́мять его́ соше́дшеся,/ того́ воспое́мъ.

Сти́хъ: Восхва́лятся преподо́бніи во сла́вѣ/ и возра́дуются на ло́жахъ свои́хъ.

Ты́ еси́ святи́телемъ похвала́,/ свяще́нникомъ удобре́ніе,/ мона́хомъ пра́вило./ И мы́ ти́ вопіе́мъ, святи́телю Алексíе:/ ра́дуйся, Це́ркве утвержде́ніе.

Сти́хъ: Свяще́нницы Твои́ облеку́тся въ пра́вду,/ и преподо́бніи Твои́ возра́дуются.

Пріими́ ны́нѣ пѣ́ніе/ ча́дъ твои́хъ, о́тче,/ вѣ́рою пра́зднующихъ,/ и лю́бящимъ тя́ подава́й/ я́же на по́льзу проше́нія.

Сла́ва, гла́съ 6. Самогла́сенъ:

Благíй ра́бе, вѣ́рный дѣ́лателю виногра́да Христо́ва, ты́ и тяготу́ дневну́ю поне́слъ еси́, ты́ и да́нный ти́ тала́нтъ возрасти́лъ еси́ и по тебѣ́ прише́дшимъ не зави́дѣлъ еси́. Тѣ́мже врата́ небе́сная отверзо́шася тебѣ́: вни́ди въ ра́дость Го́спода твоего́ и моли́ о на́съ, свя́те Алексíе.

И ны́нѣ, богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

На благослове́ніи хлѣ́бовъ тропа́рь, гла́съ 8: Яко апо́столомъ сопресто́льна.., два́жды пи́санъ на ма́лѣй вече́рни, и Богоро́дице Дѣ́во.., еди́ножды.

НА УТРЕНИ.


На Бо́гъ Госпо́дь.., тропа́рь свята́го, два́жды. Сла́ва, и ны́нѣ, богоро́диченъ.

По 1-й стихоло́гіи сѣда́ленъ, гла́съ 8:

Наста́ свѣтоно́сный де́нь, чудотво́рца архіепи́скопа Алексíя па́мять. Пріиди́те, соше́дшеся, пра́зднуемъ свѣ́тло и соста́вимъ ли́ки, похвала́ми почти́мъ его́ и рце́мъ ему́: ра́дуйся, честны́й свѣти́льниче Россíйскія земли́, источа́еши бо чудеса́, и излива́еши исцѣле́нія, и мо́лишися о душа́хъ на́шихъ. Два́жды.

Сла́ва, и ны́нѣ, богоро́диченъ:

Да Тво́й па́ки сози́ждеши о́бразъ, истлѣ́вшій страстьми́, Спа́се, небе́сныхъ утаи́вся суще́ствъ, воплоти́лся еси́ отъ Дѣ́вы. Ейже согла́сно возопіе́мъ: ра́дуйся, Благода́тная, Госпо́дь съ Тобо́ю.

По 2-й стихоло́гіи сѣда́ленъ, гла́съ 4:

Пріиди́те, торжеству́емъ свѣ́тло, пра́зднующіи па́мять іера́рха, Алексíя чудотво́рца, преста́вися бо отъ земли́ къ невеще́ственнымъ оби́телемъ, идѣ́же зри́тъ добро́ту неизрече́нную, а́нгельскимъ во́инствомъ собесѣ́дникъ я́влься. Тѣ́мже со апо́столы и му́ченики лику́я, о́тче на́шъ, Алексíе преподо́бне, прилѣ́жно моли́ся Влады́цѣ Христу́ о чту́щихъ вѣ́рою па́мять твою́. Два́жды.

Сла́ва, и ны́нѣ, богоро́диченъ:

Стѣна́ необори́мая на́мъ христіа́номъ еси́, Богоро́дице Дѣ́во: къ Тебѣ́ бо прибѣга́юще, невреди́ми пребыва́емъ и, па́ки согрѣша́юще, и́мамы Тя́ мо́литвенницу. Тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

По поліеле́и сѣда́ленъ, гла́съ 8. Подо́бенъ: Прему́дрости.

Проповѣ́дуетъ, о́тче, твоя́ чудеса́ ны́нѣ Россíйская митропо́лія и вся́ оте́чествія и страны́ чудодѣ́йствія, и́миже вся́ отъ болѣ́зней ско́рбныхъ избавля́еши, богоблаже́нне Алексíе, пита́телю вдо́въ и сиро́тъ оте́цъ, помо́щникъ су́щимъ въ ско́рби всеизря́денъ, пла́чущимъ утѣше́ніе, па́стырь и наста́вникъ всѣ́мъ заблужда́ющимъ, Алексíе преподо́бне. И на́съ твои́ми моли́твами отъ бѣ́дъ изба́ви и моли́ся Христу́ Бо́гу, да грѣхо́въ оставле́ніе пода́стъ вѣ́рою и любо́вію чту́щимъ святу́ю па́мять твою́. Два́жды.

Сла́ва, и ны́нѣ, богоро́диченъ:

Ра́дуйся, а́нгеломъ ра́дость мíра пріе́мшая; ра́дуйся, ро́ждшая Творца́ Твоего́ и Го́спода; ра́дуйся, сподо́бльшаяся бы́ти Ма́ти Бо́жія.

Та́же степе́нна, 1-й антифо́нъ 4-го гла́са. Про́кименъ, гла́съ то́йже: Честна́ предъ Го́сподемъ/ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Іоа́нна, зача́ло 36. Та́же псало́мъ 50-й.

По 50-мъ псалмѣ́ стихи́ра, гла́съ 6:

Неиздае́ма е́сть благода́ть святи́теля Алексíя, ю́же прія́тъ отъ всѣ́хъ Христа́ Бо́га, тѣ́мъ и честны́я его́ мо́щи Бо́жіею си́лою вы́ну содѣва́ютъ чудеса́ и всѣ́хъ, вѣ́рою призыва́ющихъ и́мя его́, отъ неисцѣ́льныхъ неду́гъ измѣня́ютъ. Его́же моли́твами, Го́споди, Христолюби́вому Импера́тору на́шему посо́бствуй на враги́ и належа́щихъ скорбе́й душе́вныхъ и тѣле́сныхъ свободи́, я́ко Человѣколю́бецъ.

Кано́нъ Богоро́дицы, со ирмосо́мъ, на 6 и свята́го на 8.

Кано́нъ святи́теля, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Колесни́цею благода́ти Твоея́, Го́споди, возвы́си на́ша по́мыслы отъ до́льнихъ на го́рняя и сподо́би восхвали́ти уго́дника Твоего́, святи́теля Алексíя, пѣ́снь Тебѣ́, Бо́гу, воспѣва́юща.

Колесни́цею хода́тайствъ твои́хъ у́мъ на́шъ, отягче́нный жите́йскими печа́льми, возвы́си отъ земны́хъ къ небе́снымъ и наста́ви восхвали́ти тя́ досто́йно, о́тче Алексíе, пѣ́снь побѣ́дную Бо́гу воспѣва́юща.

Колесни́цу го́рдости мíра сего́ превозше́лъ еси́ смире́ніемъ, и, взе́мъ кре́стъ тво́й, послѣ́довалъ еси́ Христу́ добро́тами, и, во приста́нище го́рняго селе́нія дости́гъ, пѣ́снь Бо́гу побѣ́дную воспѣва́еши.

Колесни́цею добродѣ́телей, я́ко Илія́ о́гненною, возше́лъ еси́ на не́бо, отону́дуже моли́ Бо́га низпосла́ти я́ко ми́лоть благода́ть Ду́ха, уча́щую ны́ пѣ́снь побѣ́дную Бо́гу воспѣва́ти.

Богоро́диченъ: Колесни́це огнеобра́зная, носи́вшая Бо́га Сло́ва, во чре́вѣ Твое́мъ воплоще́ннаго, моли́ Его́ прилѣ́жно спасти́ся рабо́мъ Твои́мъ, къ Тебѣ́ притека́ющимъ и побѣ́дную пѣ́снь Бо́гу воспѣва́ющимъ.

Инъ кано́нъ, творе́ніе іеромона́ха Епифа́нія Славини́цкаго, ѳеоло́га, жи́вша во оби́тели его́. Гла́съ 4.
Пѣ́снь 1.

Ирмо́съ: Пои́мъ, лю́діе, ди́вно чудодѣ́йствовавшему въ Чермнѣ́мъ мо́ри Христу́ Бо́гу, я́ко дре́вле Изра́иля всевооруже́на стопа́ми пѣшеше́ствовати непрохо́дную сотвори́ и зло́бы дѣлода́теля фарао́на во глубинѣ́ потопи́.

Богосія́тельными Тріѵпоста́снаго Свѣ́та заря́ми богови́дно озаре́нный, златоза́рный свѣти́льниче церко́вный, богому́дре Алексíе, мо́лимъ тя́: свѣтоно́сными твои́хъ моли́твъ луча́ми въ достолѣ́пую твою́ похвалу́ просвѣти́ у́мъ тя́ хва́лящихъ.

Христоподража́тельный а́нгеле земны́й, богомы́сленный небе́снымъ а́нгеломъ собесѣ́дниче, боговѣнча́нный а́дскихъ а́нгелъ побѣди́телю, удосто́ивыйся зрѣ́ти Вели́каго Совѣ́та Ангела, Бо́га воплоще́нна, треблаже́нне Алексíе, мо́лимъ тя́: твои́ми боговнуша́емыми мольба́ми изба́ви ны́ отъ душевре́дныхъ прило́гъ а́дскихъ.

Горьково́дною душетлѣ́нныхъ прегрѣше́ній бу́рею потопля́еми, къ тебѣ́, я́ко досточу́дну вла́ющагося мо́ря утиши́телю, прибѣга́юще, вопіе́мъ: свя́те Алексíе, твои́ми богоуго́дными моли́твами ути́ши волну́ющееся страсте́й на́шихъ мо́ре.

Богоро́диченъ: Свѣтоно́сный о́блаче, одожди́вый на́мъ До́ждь небе́сный, воплоще́нное Сло́во Божіе, Богороди́тельнице Дѣ́во, небото́чною Твоего́ благоутро́бія водо́ю погаси́ огнепа́льный вредоно́сныхъ страсте́й на́шихъ пла́мень.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Небе́снаго кру́га и всея́ тва́ри Госпо́дь, предвѣ́дый тя́, о́тче Алексíе, бу́дуща па́стыря добра́, ввѣ́ри тебѣ́ па́ству слове́сную, я́ко еди́нъ Человѣколю́бецъ.

Небе́снаго кру́га возлюби́въ Творца́, посто́мъ облегче́нъ, страсте́й мо́ре преше́лъ еси́ и, на безстра́стія ве́рхъ добродѣ́тельми возше́дъ, Бо́га узрѣ́лъ еси́, еди́наго Человѣколю́бца.

Небе́снаго кру́га на высоту́ возше́дъ богоразу́міемъ, уви́дѣлъ еси́ у́мно та́мо неизрече́нная и прія́лъ еси́ да́ръ чудотворе́нія отъ Бо́га Человѣколю́бца.

Богоро́диченъ: Небе́снаго кру́га Верхотво́рца, хотя́ща роди́тися изъ Тебе́, Пречи́стая, возвѣсти́ Тебѣ́ Гавріи́лъ: ра́дуйся, Дѣ́во, Госпо́дь съ Тобо́ю, еди́нъ Человѣколю́бецъ.

Инъ.

Ирмо́съ: Да не хва́лится му́дръ, хваля́йся, но о се́мъ, е́же разумѣва́ти, я́ко нѣ́сть свя́тъ, я́ко Бо́гъ на́шъ, вознося́й ро́гъ на́шъ, дая́й крѣ́пость Импера́тору на́шему.

Тя́, богому́дра ко́рмчія, небе́снымъ сло́ва Бо́жіяго корми́ломъ богохрани́мый кора́бль Россíйскія Це́ркве къ благоти́шному вѣ́чныя жи́зни при́станищу пра́вѣ корми́льствовавша, блажа́ще, мо́лимъ: всече́стне Алексíе, къ благове́дрой покая́нія тишинѣ́ корми́льствуй ду́ши на́ша.

Душеспаси́тельну всемо́щнаго мо́ря Творца́ за́повѣдь благопоспѣ́шно сохра́нша и бу́рная вла́ющагося мо́ря треволне́нія моли́твою утиши́вша, твои́мъ чудодѣйстви́тельнымъ предста́тельствомъ утиши́ волну́ющуюся скорбе́й на́шихъ бу́рю.

Златото́чная рѣко́ Бо́жія, небе́сными Ева́нгельскаго уче́нія вода́ми богосажде́нный Це́ркве Россíйскія ра́й наводни́вшая оби́льно, досточу́дне Алексíе, небото́чною духо́вныя ра́дости струе́ю напая́й скорбя́щія ду́ши на́ша.

Богоро́диченъ: Въ богозда́нномъ богосло́вяще Це́ркве апо́стольскія не́бѣ, къ Тебѣ́, свѣтоно́сному Незаходи́маго Со́лнца Не́бу, прибѣга́емъ, вопію́ще: Всепѣ́тая Дѣ́во, Твое́ю небе́сною по́мощію помози́ на́мъ, Тя́ блажа́щимъ, въ небе́сная всели́тися жили́ща.

Сѣда́ленъ, гла́съ 4:

Благово́нною сло́ва Бо́жіяго па́житію слове́сную па́ству Христо́ву богоуго́дно воспита́нную, па́стырскимъ богодухо́внымъ исправле́нія жезло́мъ на пра́вую спасе́нія стезю́ путево́дствивъ я́ко до́брый па́стырь, удосто́ился еси́ нетлѣ́нну вѣ́чныя жи́зни мзду́ воспрія́ти въ го́рнѣмъ Сіо́нѣ отъ Пастыренача́льника Христа́ Бо́га. Его́же моли́, досточу́дне Алексíе, на́мъ, твои́мъ овца́мъ слове́снымъ, сохрани́тися отъ неви́димыхъ волко́въ хи́щныхъ.

Сла́ва, гла́съ 8. Подо́бенъ: Прему́дрости.

Ду́хомъ Боже́ственнымъ пома́зася ве́рхъ тво́й свяще́нный, архіере́е Алексíе, и сни́де на тя́ бла́годать бога́тно, и пребы́сть, я́ко мѵ́ро на главѣ́, сходя́щее на браду́, браду́ Ааро́ню, исходя́щая, я́ко роса́ Аермо́нская, и ороша́ющая ка́плями благодѣя́ній твои́хъ притека́ющія къ ра́цѣ моще́й твои́хъ и зову́щія тебѣ́ усе́рдно: о́тче преподо́бне, моли́ Христа́ Бо́га грѣхо́въ оставле́ніе дарова́ти чту́щимъ досто́йно святу́ю па́мять твою́.

И ны́нѣ, богоро́диченъ:

Повелѣ́нное та́йно пріе́мъ въ ра́зумѣ, въ кро́вѣ Іо́сифовѣ тща́ніемъ предста́ безпло́тный, глаго́ля Неискусобра́чней: Приклони́вый схожде́ніемъ небеса́ вмѣща́ется неизмѣ́нно ве́сь въ Тя́. Его́же и ви́дя въ ложесна́хъ Твои́хъ, пріе́мша ра́бій зра́къ, ужаса́юся зва́ти Тебѣ́: ра́дуйся, Невѣ́сто Неневѣ́стная.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Ты́ моя́ крѣ́пость, Го́споди, Ты́ моя́ и си́ла, — вопія́, о́тче Алексíе, прія́лъ еси́ да́ръ тѣле́сныя неду́ги цѣли́ти и лука́выя ду́хи отгоня́ти отъ зову́щихъ Христу́: си́лѣ Твое́й сла́ва, Человѣколю́бче.

Ты́ еси́ свѣти́ло Россíйскія земли́ и гра́ду Москвѣ́ стѣна́ неруши́ма, на враги́ же побѣди́тель, и Благовѣ́рному Импера́тору на́шему во бранѣ́хъ посо́бникъ, зову́щему Христу́: си́лѣ Твое́й сла́ва, Человѣколю́бче.

Ты богосло́вилъ еси́ Еди́ницу несозда́нную, въ Тріе́хъ Ли́цѣхъ су́щую, неслива́ему же и нераздѣ́льну, воумля́я па́ству твою́, о́тче Алексíе, непреста́нно зва́ти: си́лѣ Твое́й сла́ва, Человѣколю́бче.

Богоро́диченъ: Ты́ моя́ крѣ́пость еси́ вои́стинну и спасе́ніе, Богоро́дице, и на Тя́ наде́жду мою́ возложи́хъ, спаси́ мя, Дѣ́во Чи́стая, и укрѣпи́ Ро́ждшемуся изъ Тебе́ зва́ти: си́лѣ Твое́й сла́ва, Человѣколю́бче.

Инъ.

Ирмо́съ: Гла́сомъ благоглаго́ливымъ предразумѣ́въ, Авваку́мъ зря́ше Сло́ва воплоще́ніе и взыва́ше я́вѣ: слу́хъ услы́шахъ Бо́жія совѣ́та, Бо́гъ бо непрело́жно Человѣ́комъ возбесѣ́дуетъ, изъ горы́ гряды́й Дѣ́вственнаго чре́ва и мíръ избавля́я началоро́дныя кля́твы.

Богосодѣ́янною смиренному́драго исправле́нія мре́жею неисче́тное ры́бъ слове́сныхъ мно́жество богопоспѣ́шно уловле́й, богому́дрый ло́вче, досточу́дный Алексíе, богокова́нною предста́тельства твоего́ у́дицею извлецы́ ны́ изъ глу́бокія зо́лъ мно́гихъ пучи́ны.

Небе́снымъ сло́ва Бо́жія врачевство́мъ душетлѣ́нныя уврачевствова́вый людски́хъ грѣхопаде́ній я́зи и богоустро́еннымъ кро́ткаго наказа́нія пла́стыремъ умовре́дныя исцѣли́вый ра́ны, безме́здный цѣли́телю, досточу́дный Алексíе, мо́лимъ тя́: исцѣли́ душевре́дныя грѣхо́въ на́шихъ стру́пы.

Благоплодови́тое богонасажде́ннаго са́да дре́во, благово́нныя прозя́бшее достохва́льныхъ исправле́ній плоды́ и плодоно́сныя просте́ршее къ не́бу боговнуши́мыхъ моле́ній вѣ́тви, всечу́дне Алексíе, мо́лимъ тя́: богора́сленнымъ твоего́ покро́ва ли́ствіемъ осѣни́ ны́ отъ вредоно́снаго лю́тыхъ бѣ́дъ же́га.

Богоро́диченъ: Къ Тебѣ́, златоза́рная Свѣ́та Неве́черняго Заре́, Богороди́тельнице Дѣ́во, прибѣга́емъ, вопію́ще: свѣтоза́рнымъ Твоего́ защище́нія сія́ніемъ разрѣши́ темнозра́ченъ о́блакъ печа́лей на́шихъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Вску́ю проти́вніи ополча́ются на ны, иму́щія тя крѣ́пка побо́рника? Ты, о́тче Алексíе, де́рзость и́хъ низложи́ и Правосла́внаго Импера́тора на́шего моли́твою твое́ю стра́шна и́мъ покажи́.

Вску́ю уныва́емъ, согнѣта́еміи мно́жествомъ печа́лей, иму́ще ско́рбныхъ утѣ́шителя — святи́теля Алексíя, избавля́юща ны́ отъ бѣ́дъ и скорбе́й на́шихъ и отъ вра́гъ ви́димыхъ же и неви́димыхъ?

Вску́ю, о́тче Алексíе, тѣле́сныя не́мощи нахо́дятъ на ны́, и бѣды́ окружа́ютъ ны́, врача́ тя́ иму́щія въ болѣ́знехъ и утѣ́шителя въ ско́рбехъ? Изми́ у́бо ны́ отъ си́хъ моли́твами твои́ми.

Богоро́диченъ: Вску́ю обурева́ютъ мя́ во́лны страсте́й, Ко́рмчія Христа́ ро́ждшая, Дѣ́во Всенепоро́чная? Ты́ Его́ моли́ си́хъ исхи́тити мя́ и къ стези́ за́повѣдей Его́ пути́ моя́ упра́вити, молю́ся.

Инъ.

Ирмо́съ: Нощебори́мыхъ страсте́й тимѣ́ніемъ къ Тебѣ́ у́тренюю, Еди́ному Благоутро́бному, души́ моея́ мглу́ просвѣти́ и у́зы пресѣки́ долго́въ мои́хъ, я́ко да Твои́мъ Соприсносу́щнымъ Ду́хомъ просвѣща́емь, пра́вды пу́ть нетлѣ́нный обря́щу повелѣ́ній Твои́хъ.

Слове́сную па́ству Христо́ву благово́ннымъ Ева́нгельскаго уче́нія зла́комъ богоуго́дно воспита́вый и на пра́вый христоподража́тельнаго житія́ пу́ть боголѣ́пно наставле́й, па́стырю до́брый, всеблаже́нне Алексíе, мо́лимъ тя́: твои́ми моли́твами наста́ви ны́ на пра́вую за́повѣдей Бо́жіихъ стезю́.

Богозда́нный Ду́ха Свята́го сосу́де, чи́стымъ любве́ Бо́жія зла́томъ боголѣ́пно позлаще́нный, богому́дре о́тче Алексíе, раждеже́нымъ сло́ва Божія сребро́мъ ча́да твоя́ обогаще́й оби́льно, мо́лимъ тя́: твои́ми моли́твами пода́ждь на́мъ небе́сное Бо́жія благода́ти бога́тство.

Богонача́льному премíрныхъ умо́въ ли́ку сообще́нный и богосія́тельными Тріѵпоста́снаго Свѣ́та заря́ми богови́дно озаре́нный, у́ме богому́дрый, священнонача́льниче Алексíе, небе́сною богооткрове́нныя ти́ му́дрости луче́ю просвѣща́й свы́ше мра́чныя умы́ на́ша.

Богоро́диченъ: Богора́сленный Гро́здъ, воплоще́нное Сло́во Бо́жіе прозя́бшая, богосажде́нная Лозо́, Всенепоро́чная Дѣ́во, мо́лимъ Тя́: благово́ннымъ Бо́жія благода́ти вино́мъ напая́й жа́ждущія ду́ши на́ша.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Очи́сти ны́, Спа́се, отъ мно́гихъ грѣхо́въ на́шихъ и болѣ́зни отжени́ моли́твами святи́теля Твоего́ Алексíя, и ми́ръ Це́рквамъ Твои́мъ пода́ждь и соедине́ніе.

Очи́сти сердца́ на́ша и мы́сли хода́тайствы твои́ми, о́тче, и, пріи́мъ отъ на́съ приноси́мыя тебѣ́ моли́твы, испроси́ у Христа́ обрѣсти́ на́мъ ве́лію ми́лость.

Очи́стивъ се́рдце твое́, о́тче Алексíе, и трость язы́ка твоего́ изостри́въ Ду́хомъ, написа́лъ еси́ въ сердца́хъ вѣ́рныхъ сло́во богоразу́мія уче́ньми твои́ми.

Богоро́диченъ: Очище́нну Тя́ Ду́хомъ, Всенепоро́чная, арха́нгелъ Гавріи́лъ позна́въ, зовя́ще Тебѣ́: ра́дуйся, Дѣ́во Марíе, па́дшихъ воззва́ніе и кля́твы разрѣше́ніе.

Инъ.

Ирмо́съ: Изъ чре́ва а́дова во́пля моего́ услы́шалъ еси́ гла́съ мо́й и возве́лъ еси́ отъ тли́ бу́ри прегрѣше́ній, обдержи́тъ бо, Спа́се, и погружа́ти искуша́етъ, Бла́же: но я́коже пре́жде Іо́ну возве́лъ еси́ отъ тли́, и мене́, молю́ся, Го́споди, предвари́въ, спаси́.

Златоза́рная Россíйская звѣздо́, свѣтоно́сными равноапо́стольскихъ исправле́ній заря́ми богозда́нное Це́ркве Бо́жія не́бо озари́вшая свѣ́тло и темномра́чну ва́рварскихъ навѣ́товъ мглу́ разрѣ́шшая богопоспѣ́шно, всеблаже́нне Алексíе, разрѣши́ тѣ́менъ напа́стей вра́жіихъ о́блакъ.

Въ боголѣ́пную невеще́ственнаго Бо́га сла́ву веще́ственныя хра́мы Бо́жія боготща́тельно созда́вый, мы́сленный хра́ме Бо́жій, богоно́се Алексíе, мо́лимъ тя́, богоуго́дными твои́ми мольба́ми богопріе́мный хра́мъ Бо́жій сози́жди сердца́ на́ша.

Пагуборо́дное го́рдаго киче́нія те́рніе исто́ргнувый и доброра́сленныя смиреному́драго богомы́слія лѣ́торасли богопоспѣ́шно возрасти́вый, благоплодови́тый небе́снаго са́да ко́реню, всечу́дне Алексíе, насади́ въ сердца́хъ на́шихъ богорасти́тельный богоуго́днаго смире́нія ко́рень.

Богоро́диченъ: Всемо́щнаго морски́хъ треволне́ній Утиши́теля, воплоще́нное Сло́во Бо́жіе ро́ждшая, Богоро́дице Дѣ́во, небе́сною Твоего́ засту́пничества тишино́ю многобу́рную утиши́ скорбе́й на́шихъ молву́.

Конда́къ, гла́съ 8. Подо́бенъ: Взбра́нной.

Боже́ственнаго и пречестна́го святи́теля Христо́ва, но́ваго чудотво́рца Алексíя, вѣ́рно вси́ пою́ще, лю́діе, любо́вію да ублажи́мъ, я́ко па́стыря вели́каго, служи́теля же и учи́теля прему́дра земли́ Россíйстѣй. Дне́сь, въ па́мять его́ прите́кше, ра́достно возопіе́мъ пѣ́снь богоно́сному: я́ко имѣ́я дерзнове́ніе къ Бо́гу, многообра́зныхъ на́съ изба́ви обстоя́ній, да зове́мъ ти́: ра́дуйся, утвержде́ніе гра́ду на́шему.

Икосъ:

Ди́внаго и пречестна́го чудотво́рца ви́дяще чудеса́, исцѣле́нія подава́юща всѣ́мъ, отъ души́ съ вѣ́рою притека́ющимъ, и Христо́вы лю́ди неви́димо посѣща́юща, и зе́млю Россíйскую просвѣща́юща, ра́достно отъ души́ вси́, вку́пѣ соше́дшеся къ ра́цѣ моще́й его́, слы́шаще же и ви́дяще чуде́съ мно́жество и исто́чникъ исцѣле́ній неисчерпа́емь, чи́стыми сердцы́ и просвѣще́нными ра́зумы, я́ко благоуха́нно кади́ло, плоды́ добродѣ́тельны отъ души́ принося́ще и ра́дующеся, воззове́мъ ему́, глаго́люще: ра́дуйся, о́тче, честны́й на́шъ учи́телю, я́ко прія́лъ еси́ трудо́въ твои́хъ воздая́ніе и въ вы́шнихъ водворя́ешися, о на́съ моля́ Человѣколю́бца Бо́га. Чуде́съ да́ръ прія́лъ еси́, земли́ Россíйстѣй оте́цъ и учи́тель, и святи́телемъ изря́дная похвала́, и Благовѣ́рному Импера́тору на́шему во бранѣ́хъ посо́бникъ крѣ́покъ. Ра́дуйся, святи́телю Алексíе, гра́ду на́шему утвержде́ніе.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Отъ Іуде́и отроко́мъ поревнова́въ, огнепа́льныя стра́сти угаси́лъ еси́, Христу́ при́сно поя́, блаже́нне Алексíе: отце́въ Бо́же, благослове́нъ еси́.

Отъ Іуде́и о́троки подража́лъ еси́, живу́щею бо въ тебѣ́ Ду́ха благода́тію просвѣ́щся, воспѣ́лъ еси́ Христу́: отце́въ Бо́же, благослове́нъ еси́.

Отъ Іуде́и отроко́мъ ревну́емъ, ви́дяще мо́щи твоя́ чудоточа́щія, любо́вію распаля́еми, Христу́ зове́мъ: отце́въ Бо́же, благослове́нъ еси́.

Богоро́диченъ: Отъ Іуде́и о́троцы Твое́ прообрази́ша Рождество́, Дѣ́во Всечи́стая, о́гнь бо въ пещи́ не опали́ и́хъ, пою́щихъ: отце́въ Бо́же, благослове́нъ еси́.

Инъ.

Ирмо́съ: Тя́ живопису́ющій ассирíйскій пла́мень ю́ноши три́ спасе́, Го́споди, я́коже и Дѣ́ву не опали́ Отрокови́цу, въ Боже́ственномъ Рождествѣ́ Твое́мъ Боже́ственная Искра, препѣ́тый отце́въ Бо́же, благослове́нъ еси́.

Тя, я́ко отъ Небе́снаго Врача́ да́ръ исцѣле́нія ту́не пріе́мша, та́ко вредоно́сныя къ тебѣ́ прибѣга́ющихъ я́зи ту́не исцѣли́вша, усе́рдно мо́лимъ, врачу́ безме́здный, архіере́е Алексíе: небе́сною твои́хъ мо́льбъ цѣльбо́ю исцѣли́ лю́тыя неду́ги ду́шъ и тѣле́съ на́шихъ.

Боготка́нная правосла́внаго благоче́стія ри́зо, многоцѣ́нными превели́кихъ добродѣ́телей би́серми боголѣ́пно удобре́ная, всехва́льне Алексíе, моли́ свѣ́томъ одѣя́ющася Бо́га въ свѣ́тлую вѣ́чныя жи́зни ри́зу одѣ́ятися душа́мъ на́шимъ.

Трудолю́бный богосажде́ннаго са́да дѣ́лателю, благово́нную досточу́дныхъ исправле́ній кассíю насади́вый и богора́сленную по́стническаго воздержа́нія сми́рну въ боголюби́вомъ се́рдцѣ твое́мъ вкорени́вый, свя́те Алексíе, небото́чную защище́нія твоего́ ста́кту изле́й на лю́бящая тя́ сердца́ на́ша.

Богоро́диченъ: Отъ богосія́тельнаго Пра́вды Со́лнца богооткрове́нно па́че умо́въ премíрныхъ озаря́ема, свѣтоза́рная Луно́, Всенепоро́чная Дѣ́во, свѣтоно́сною Твоея́ благода́ти луче́ю мра́чная просвѣти́ сердца́ на́ша.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Царя́ Небе́снаго хвали́ти учи́лъ еси́ па́ству твою́, зовы́й: по́йте и превозноси́те Христа́ во вѣ́ки.

Царя́ Небе́снаго умоли́ о на́съ, ча́дѣхъ твои́хъ, ра́достно пою́щихъ и превознося́щихъ Его́ во вѣ́ки.

Царю́ Небе́сному предстоя́, па́ству твою́ назира́й, пою́щую и превознося́щую Христа́ во вѣ́ки.

Богоро́диченъ: Царя́ Небе́снаго родила́ еси́, Дѣ́во, Его́же а́нгели пою́тъ и превозно́сятъ во вся́ вѣ́ки.

Инъ.

Ирмо́съ: Находя́щія въ пла́мени беззако́ннаго мучи́теля велѣ́ніемъ о́троки подража́юще немо́лчными устна́ми въ вы́шнихъ похва́льно возопіи́мъ: Бла́же, преесте́ственно Сы́й Пресвяты́й, пою́щія Тя́ Свѣ́томъ у́мнымъ Твои́мъ озари́.

Небе́сною богопрія́тныя моли́твы цѣльбо́ю тѣле́сную ва́рварскія цари́цы слѣпоту́ преесте́ственно исцѣли́вый, богому́дрый, душе́вныхъ и тѣле́сныхъ неду́гъ цѣли́телю, всеблаже́нне Алексíе, мо́лимъ тя́: душе́вную исцѣли́ слѣпоту́ вредоно́сныхъ прегрѣше́ній на́шихъ.

Церко́вная красото́, преосвяще́нная главо́, непоколе́бленный благоче́стія сто́лпе, богозда́нный вѣ́ры степе́ню, неисчерпа́емая Боже́ственныхъ чуде́съ пучи́но, всече́стне Алексíе, златото́чными твои́хъ мо́льбъ вода́ми вредоно́сенъ погаси́ о́гнь печа́лей на́шихъ.

Пагубоно́сное грѣхопаде́ній ство́ліе боже́ственнымъ любве́ Бо́жія огне́мъ богоуго́дно соже́гъ и богозда́ннымъ вѣ́ры степе́немъ къ невеще́ственну Огню́ преесте́ственну, въ Живонача́льной Тро́ицѣ Бо́гу, приступи́въ благоговѣ́йно, преподо́бне о́тче Алексíе, отъ гее́нскаго огня́ изба́ви ду́ши ча́дъ твои́хъ, тя́ блажа́щихъ.

Богоро́диченъ: Присносу́щную Жизнь, воплоще́нное Сло́во Бо́жіе па́че сло́ва человѣ́ча и́стинно ро́ждшая, Всепѣ́тая Богоро́дице Дѣ́во, мо́лимъ Тя́: изба́ви ны́, рабы́ Твоя́, отъ вѣ́чныя сме́рти.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Вои́стинну свѣ́тъ мíру яви́лся еси́, свѣтя́щъ добро́дѣтельми, и па́стырь изря́денъ твоего́ ста́да бы́лъ еси́, Христа́ велича́юща.

Вои́стинну вѣ́мы тя́, о́тче, чудотво́рца вели́ка, точа́ща мно́га чудеса́ вѣ́рно къ тебѣ́ приходя́щимъ и Христа́ велича́ющимъ.

Вои́стинну свѣ́тло па́мять пра́зднуютъ святи́теля Алексíя ца́ріе, архіере́и и вси́ лю́діе, Христа́ Бо́га велича́юще.

Богоро́диченъ: Вои́стинну Ты́ еси́ христіа́номъ спасе́ніе: Христа́ бо родила́ еси́, спаса́ющаго ны́, Дѣ́ву Чи́сту Тя́ велича́ющія.

Инъ.

Ирмо́съ: Въ Тебѣ́, Богоро́дице, на́ше умале́ніе преста́, неви́димое бо Сло́во во утро́бѣ Твое́й пріе́мшая, сугу́ба Того́ родила́ еси́, Бо́га вку́пѣ и Человѣ́ка, на Него́же херуви́ми воззрѣ́ти не дерза́ютъ. Тѣ́мже Тя́ велича́емъ, Пречи́стая.

Благови́дною архіере́йскихъ исправле́ній красото́ю богопоста́вленный престо́лъ тво́й боголѣ́пно украси́вый, первопресто́льный іера́рше, всече́стне Алексíе, моли́ сѣдя́щаго на премíрныхъ престо́лѣхъ Бо́га удосто́итися на́мъ, тя́ блажа́щимъ, въ Ца́рствіи небе́сномъ предста́ти Бо́жію престо́лу.

Къ чудотво́рнымъ твои́мъ моще́мъ притека́юще усе́рдно, мо́лимъ тя́, чудото́чный исто́чниче, досточу́дне Алексíе: богото́чною Боже́ственныхъ чуде́съ твои́хъ струе́ю угаси́ раждеже́ное бѣ́дъ и печа́лей на́шихъ горни́ло.

Съ ца́рствуемымъ мíромъ Правосла́внаго Импера́тора на́шего отъ вся́кихъ бѣ́дъ защити́, богозда́нный Правосла́вія щи́те и Святѣ́йшему Сѵно́ду первопресто́льный іера́рше, всеблаже́нне Алексíе, въ боголѣ́пое церкве́й Бо́жіихъ благострое́ніе да́ждь свы́ше небе́сную по́мощь.

Богоро́диченъ: Богови́дцемъ Моисе́емъ ви́дѣнная въ Сина́и купино́ неопа́льная, Огнь Боже́ственный, воплоще́нное Сло́во Бо́жіе ро́ждшая, Всесвята́я Дѣ́во, небе́снымъ любве́ Бо́жія огне́мъ разжзи́ оледѣ́вшая сердца́ на́ша.

Свѣти́ленъ:

Благода́ть Свята́го Ду́ха, все́льшаяся въ тя́, святи́теля тя́ пока́за. Христо́съ же ти́ вручи́ па́ству Свою́ па́ствити на па́житехъ духо́вныхъ, Его́же ра́ди потща́лся еси́ наставля́ти лю́ди. И ны́нѣ на небесѣ́хъ, ра́дуяся, живе́ши. Два́жды.

Сла́ва, и ны́нѣ, богоро́диченъ:

По Бо́зѣ упова́ніе иму́ще на Тя́, Пречи́стая Богоро́дице, мо́лимтися, ко Иже изъ Тебе́ Ро́ждшемуся мольба́ми невреди́мы на́съ до конца́ сохрани́.

На хвали́техъ стихи́ры на 4, гла́съ 8. Подо́бенъ: Что́ вы́ нарече́мъ.

Что́ тя́ нарече́мъ, святи́телю Алексíе?/ Звѣзду́, озаря́ющу поднебе́сная,/ мíра красова́ніе всечестно́е,/ сего́ луча́ми озаря́юща велѣ́ніи благовѣ́рія/ и е́реси тму́ отгоня́юща./ Моли́, преподо́бне,/ отъ тли́ и бѣ́дъ изба́витися/ вѣ́рою творя́щимъ па́мять твою́. Два́жды.

Что́ тя́ нарече́мъ, преподо́бне святи́телю Алексíе?/ Рѣку́, излива́ющу исцѣле́нія незави́стно/ всѣ́мъ, вѣ́рою приходя́щимъ,/ исто́чникъ, источа́ющь уче́ній медото́чныхъ,/ во вся́ концы́ простира́ющь/ и вѣ́рныя просвѣща́ющь./ Моли́ся, преподо́бне,/ спасти́ся душа́мъ на́шимъ.

Что́ тя́ ны́нѣ нарече́мъ,/ святи́телю Алексíе,/ преди́вный чудотво́рче?/ Врача́ разу́мна и безме́здна,/ исцѣлѣва́юща вся́ку я́зю душе́вную и тѣле́сную,/ безпло́тнымъ равноче́стна./ Моли́ся, преподо́бне,/ спасти́ся душа́мъ на́шимъ.

Сла́ва, гла́съ 6:

Человѣ́че Бо́жій и вѣ́рный ра́бе, слуго́ Госпо́день, му́жу жела́ній, сосу́де избра́нный, сто́лпе и утверже́ніе Це́ркве, Ца́рствія наслѣ́дниче, не премолчи́, вопія́ за ны́ ко Го́споду.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

Славосло́віе вели́кое, ектеніи́ и отпу́стъ.

НА ЛИТУРГІИ.

Блаже́нна отъ кано́на, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ/ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ ко Евре́емъ, зача́ло 335. Аллилу́ія, гла́съ 5: Воззва́ша пра́ведніи, и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 125 об. – 137 об.